Publicau orichinalment en El Salto – Aragón o 27 de noviembre de 2017:
L’abandono escolar prematuro al médio rural, freno pa’l desenrollo?
Foto: Patricia Gascón (DGA).
Uno dels aspectos cllau pa’l desenrollo d’estas zonas é el poder dotar als suyos habitants de l’acceso a una educacion publlica i de qualidat, lo que conlleva tanto una reivindicación de la importáncia de la escola rural pa la vida als llugars como tamé el facilitar que ixes jovens puedan seguir con estúdios postoblligatórios en pobllacions més grans. En este sentiu, la falta d’estúdios sobre l’abandono escolar prematuro al médio rural podria amagar un factor cllau pa la elaboracion de qualquier pllan de desenrollo rural que aspire a estar eficaz.
En primer puesto, s’entiende abandono escolar prematuro (AEP) quan l’alumno no alcança títols postoblligatórios, é dir, al caso espanyol, quan no contina es estúdios dimpués de la ESO. Deixar u no pas es estúdios é el punto final d’un proceso refllexivo al que inflluixen buenacosa de factors que condicionan a la persona.
Manimenos, l’abandono escolar no se distribuye de manera homogenia per la esfera social, sino que pendent de la suya situacion, l’adolescent tendrá més u menos probabilidaz d’abandonar. La cllase social, el genero, el nivel educativo dels pares, la nacionalidat u el grau d’urbanizacion son factors que s’interrelacionan entre ells condicionant la decision final.
Si s’observa es indicadors de Qualidat de Vida de l’INE en materia d’educacion de l’an 2015, vedem que l’abandono en mullers eva del 15,8 devant del 24 d’homes i d’alumnos con nacionalidat de fora de la UE eva de 35,3 devant el 17,8 de miembros de la UE i 20 d’espanyols. Encara que ixe an el dato seguntes el grau d’urbanizacion no presenta guaires diferéncias, si que el fa toz es ans anteriors. Caracteristico tamé é que en 2009, en un estúdio comparativo entre es estaus europeus, Espanya tenise la mayor tasa d’AEP a zonas de baixa densidat pobllacional.
El médio rural, per tanto, presenta caracteristicas própias amés de las variablles que inflluixen ya de per sí a l’AEP. El nivel educativo menor dels pares, la dificultat d’acceso als centros educativos u un nivel d’ingresos menor afectan a la continacion dels estúdios per part de l’alumnau rural.
Pero tamé, caldria veder si las expectativas academicas de la joventut rural s’hi veden llimitadas per l’arraigo al médio, es suyos rez socials, la falta d’orientacion u la estructura economica d’ixas zonas. Tot ixo, oblliga a repensar unas politicas educativas integraderas que complleten la responsabilidat de docents, famílias, alumnos, empresas i administración publlica a la hora d’amillorar esta situacion.
La brecha entre rural i urbano se va estreitant pero no desapareix de tot i la falta d’un analis de l’AEP rural podria dificultar ixo. Pa Aragon, on existe un gran desequilibrio pobllacional entre las zonas urbanas i rurals, fer atencion en este problema é esencial pa’l suyo desenrollo, prencipiant per repllegar es datos estadisticos de cada puesto i entender las raçons per las que la joventut decide u no pas de seguir es suyos estúdios.
Deja un comentario