Orichinalment publicau en El Salto – Aragón o 2 de setiembre de 2017:
El reggaeton podría considerar-se un caso d’hibridación cultural (fent servir el concepto de l’antropologo García Canclini) que naix de l’intercambio cultural y musical que se da a principios d’els 90 als barrios maguinals de Puerto Rico, Costa Rica y Panamá. Surche como fenomeno contracultural y como forma de confrontanza con la situación d’ixes puestos, encara que ben aprisa s’extiende per tota la pllaneta gracias a unas sociedaz per cada vez més interculturals y uns canals de comunicación y información dinamicos.
En menos de 15 anyos, el reggaeton va aconseguir consolidar-se como uno d’els estilos de musica més ascuitaus y con mayor rentabilidat, lo que va potenciar la suya comercialización y expansión pels mercaus musicals gllobals. Si ben, el component marguinal se mantiene como caracteristica en la imachen d’el discurso d’el reggaeton, lluego la propia industria musical acabaría tornant este chenero en un fenomeno de masas, sacant espacios als que ostentaban el poder d’el panorama musical y impllantant-hie las suyas propias reglas. Pa lograr-lo se reproduix tot un proceso de moldeamento y llimpieza d’els contenius pa adaptar-los a las exichencias d’el mercau internacional, sacant muito d’el suyo carácter violento.
Este proceso no ha siu alleno a polemicas. Entre altras cosas, el reggaeton ha estau tachau de mascllista y misochino debiu al trato y la forma en que se concibe a la muller. Sin entrar al debat sobre si el reggaeton ye més u menos mascllista que no altros cheneros musicals; lo cierto ye que, como apunta Gallucci al suyo analisis sobre la imachen de la muller en el discurso d’el reggaeton, el fundamento ideolochico que se troba dezaga de las principals cancions d’este chenero proyecta un perfil muller en quatre dimensions: la muller como figura sexy, seductora y desinhibida que fa una apuesta per la diversión, como personache infiel, como victima de la figura masculina u como sucheto que s’ansía tenir como companyera. D’el mesmo modo, como sinyala De Toro, a través d’el llenguache utilizau se reafirma la masculinidat hechemonica y se reproducen las lochicas de dominación masculinas.
Manimenos, recentment se crean distintos proyectos que miran de dar-li un altro significau al reggaeton y fan servir el suyo marcau carácter sexual como ferramenta de satira y critica a las estructuras dominants a la sociedat. D’esta forma, el proyecto “Chocolate Remix” naix en 2013 mirando de redefinir el chenero a través d’el concepto de “Lesbian Reggaeton”. Como se diz en la pachina web d’el proyecto “la propuesta chuga con els estereotipos y rols propios d’el chenero, y aprofitant el fort conteniu sexual caracteristico d’este tipo de musica se’n apropia d’ell pa recrear-lo en cllau queer y abordar temas tabú sobre el pllacer femenino, la sexualidat y denunciar amés diversas tematicas que freqüentment afectan al colectivo femenino y LGTB como la discriminación, la censura y la violencia a través de las suyas lletras”.
La creación d’el chenero reggaeton lesbico s’enmarcaría drento d’una concepción de la cultura como acción capablle de crear nuevas realidaz modificant els imachinarios simbolicos colectivos. La propia cantant, autora, compositora y productora de Chocolate Remix, Romina Bernardo, fa expllicito este obchetivo, reconoixent que parllar de “reggaeton lesbico” aduya a repllantear muitas cosas, trencant con la imachen dominant de la muller como musa y como obcheto sexual y situant-la como sucheto. Al suyo primer vidioclip “Lo que las mujeres quieren”, la cantant fa una critica directa als artistas de reggaeton que dominan el panorama musical y el rol de la muller en ell: Ey reguetonero macho escucha lo que digo/ (…) / ven a mi escuela a aprender lo que es echarse un polvo. Mirant asinas de fer visteras las practicas sexuals que s’escapan de la heteronormatividat dominant y la concepción falocentrica d’el sexo centrau en el coito. Chocolate Remix s’apropia de la tematica sexual de las cancions de reggaeton pa ubrir debat sobre la sexualidat lesbica, encara que el suyo impacto va més enllá y posa al centro el pllacer femenino cheneral.
Deja un comentario