Nunca no me he dedicau a las replegas de memoria, ni tampoco no a una actividat bien cercana como las grabacions etnolingüisticas, pero son dos eixercicios que me parixen bien importants e interesants.
En una sociedat que ha cambiau tantismo y tant rapedo en lo zaguer sieglo, la cheneración de la chent mas gran (las personas que agora tienen de 85 anyos entalto) han viviu lo paso d’una sociedat campesina preindustrial enta la sociedat de la información en que vivimos agora. Los cambios han estau grandismos en muitos sentius, y si no alzamos la suya memoria, no tendremos datos en lo futuro pa apercazar y analisar ixe proceso historico.
Esco – Fotografía d’Adrián Solana (Cima Norte)
En lo tocant a los lugars aragoneses, este triballo ye encara mas emocional pa la chent que i vive y pa las familias que dimanan d’allí, ya que debuixa la linia entre lo nuestro pasau y lo nuestro present. En lo caso mío, la nuestra familia paterna dimana d’Esco, lugar expropiau y espaldau por la construcción de Yesa y que en l’actualidat ye habitau por dos pastors d’ovellas. Gracias a la asociación pro reconstrucción d’Esco y a la empresa Labrit Multimedia, tenemos una replega de memoria d’Esco.
La recuperación de la memoria en lugars expropiaus por la construcción d’entibos son una necesidat pa alzar lo patrimonio humano d’ixos puestos, dau que con la zaguera cheneración que i vivió desaparece lo herencio cultural de cientos de personas que i ha viviu, y grabar a los zagueros habitants sirve pa alzar-ne un troz. En este sentiu, lo sindicato CGT ye fendo a traviés de Félix Rivas de la cooperativa Atelier de ideas una replega de la memoria de Ruesta, en la que he puesto colaborar fendo bellas transcripcions.
Por otro costau, en Artieda, de lo diagonostico que faciemos con Victor Iguácel en Empenta Artieda se viyó la necesidat de grabar a la chent gran pa alzar lo suyo patrimonio immaterial. Lo prochecto de replega lo ye fendo Senderos de Teja como una parti mas d’ “Envejece en Artieda”, fendo grabacions d’audio y transcripcions tanto en entrevistas personals como en las conversacions informals de las chentas intercheneracionals que fan dos vegadas por semana, que seguntes Rosa Roca son ufrindo información con mas suco que no las entrevistas.
En los 141 monecipios rurals aragoneses en do se charra aragonés u catalán las replegas de memoria tienen tamién una importancia bien gran. Quando charramos de las luengas, con la sociedat tradicional que se’n va, tamién marcha una parti important de la luenga. Con la desaparición de los lugars aragonesoparlants tamién desaparixe buena cosa de la luenga aragonesa, y con lo cambio social los lugars que la mantienen pierden buena cosa de lo suyo lexico y estructura que yera enreligada con a vida tradicional. En menor medida isto tamién pasa en las comarcas de parla catalana.
Presentación de «Fem Memòria» en Saidí
Por ixo me parixe muit pincho o treballo que son fendo en Saidí (Baix Cinca) con “Fem Memòria”, porque son triballando de conchunta a memoria d’o lugar y a variedat autoctona d’o catalán. Vos convido a seguir-les en os suyos retz socials y a estar a la tisva d’o documental que publicarán en rematar o prochecto. Si vos interesa o tema tamién podetz escuitar una ripa de documentos etnolingüisticos de tot Aragón en o SIPCA y en l’Archivo Audiovisual de l’Aragonés.
Deja un comentario