A Renta Basica Universal ye una propuesta de politica social que pretende que toda persona disponga d’un minimo d’ingresos guarenciaus por l’Estau, sin haber de chustificar garra contraprestación.
En Artieda igual como en diversos foros en que se debate sobre a problematica d’o despoblamiento rural s’ha planteau si la renta basica ye una ferramienta lechitima pa las personas que queremos vivir en os lugars. A charrada que fació lo sociologo y treballador social Miguel Montañés o día once de chulio sobre lo Ingreso Aragonés d’Inserción reactivo lo debat arredol d’esta medida que tamién ye contemplada en a Directriz Especial de Politica Demografica y contra la Despoblación d’a DCHA.
Charrada de Miguel Montañés
As posicions entre los actors son concaradas y trobamos tanto personas que la defienden como una medida universal que equilibra as desigualdatz (tamién a desigualdat rural-urbano) y atros que consideran que una aduya asinas fomenta a galvana y a falta d’iniciativa. Entre as dos posicions, como gosa pasar en tantos atros debatz tamién trobamos posicions intermedias.
Os partidarios d’a renta basica universal gosan argumentar que a politica social ha de transformar-se de vez que lo fa la realidat social. En iste sentiu, autors como Félix Tézanos en «La sociedad dividida» charran de que en o contexto futuro trobaremos por cada vez mas chent difuera d’o mercau laboral a causa d’a tecnificación, por lo que una gran parti d’a población habrá de sustentar-se d’unatra traza diferent a lo treballo asalariau. En iste sentiu van tamién as apreciacions d’atros expertos en economía como Carl Benedict Frey.
Segunda parti d’a entrevista d’Iñaki Gabilondo a Carl Benedict Frey (min. 9:52 charran d’a RBU)
En a practica no existe una renta basica universal ni en Aragón ni en garra comunidat autonoma anque sí que existen as aduyas socials, como l’IAI u «Ingreso Aragonés d’Insercion». Estas aduyas son diferents a los subsidios directos que concede l’INAEM, dau que son aduyas indirectas de servicios socials que han de pasar por a evaluación d’os profesionals. En este sentiu, ye important entender que l’IAI pende de decisions politicas, ya que tien un presupuesto asignau por as cortz d’Aragón. As administracions tienen instruccions internas que son consignas de cómo y a quí conceder la aduya. De atra man, tien un peso muit important a subchectividat d’a treballadora social y tamién d’as personas que fan parti d’a estructura institucional de l’Instituto Aragonés de Servicios Socials que lo concede.
Bells requisitos pa demandar ista aduya son:
- Una anyada minimo d’empadronamiento en Aragón
- Tener entre 18 y 65 anyos d’edat
- No tener dreito a las aduyas por desemplego
- No plegar a los ingresos minimos en a unidat familiar dintro d’a mesma vivienda
- Permiso de residencia (extranchers)
L’IAI consta d’un minimo de 472 euros/mes (datos 2017) que puyan seguntes as causisticas particulars d’as unidatz familiars y que s’activa y se desactiva si o demandant troba treballo u lo pierde. Amás a concesión ye de tres anyadas revisables. Cuenta con mas de 20 millons d’euros de presupuesto estianyo y se va concendindo seguntes as instruccions internas de l’administración (IASS).
No ye claro que a Renta Basica siga la ferramienta necesaria pa las transformacions socials que viene, porque se puede preixinar atras politicas que permitan que todas as personas puedan tener una vida digna, pero ye claro que ye una ferramienta (igual como l’IAI) que se puet emplear pa guarenciar que as personas puedan vivir en o suyo lugar, u en o puesto que ellas triguen.
Deja un comentario