Sociolochía prencipia una nueva etapa, con a mesma filosofía que fa dos anyos quando naixió y con un cambio de look gracias a lo disenyo web que ha feito Adrián Solana de Cima Norte.
Este espacio se creyó como un portal profesional en do divulgar o treballo que realizo como sociologo dende Artieda, y pa afundar en a perspectiva d’a Sobirania d’o conoiximiento. En os zaguers meses he empecipiau a treballar en o NASTAT de Navarra, tenendo poco tiempo pa adedicar-li a la actividat sociolochica difuera d’este atro treballo. En este sentiu Sociolochía ha evolucionau enta un espacio mas d’opinión, reflexión y teoría que no de divulgación scientifica. Os treballos en os que he feito parti en os zaguers anyos continan expuestos en a sección proyectos, manimenos pa reforzar a parti d’os articlos curtos, he puyau bells articlos d’opinión escritos por yo en diferents medios de comunicación en os zaguers anyos y d’aquí enta lo futuro miraré de difundir esta mena d’escritos de vez en o blog y en atros medios aragoneses pa aconseguir un impacto mas gran.
A filosofía de Sociolochía ye la Sobiranía d’o conoiximiento. O conoiximiento y a scienca son producius, distribuius y amagaus en as universidatz y centros d’estudios, entre atras institucions, mientres que la Sobiranía d’o conoiximiento plantia que ixa producción, ixa distribución y a la fin, ixe control, habría d’estar en as mans d’o pueblo. A ormino en os centros de conoiximiento scientifico-tecnico se clasifica y ordena la vida d’as personas oprimidas: d’a clase treballadora, d’as chovens, d’os habitants d’as zonas rurals, d’as mullers, d’os pueblos oprimius etc. Amás amás este conoiximiento s’escribe en a luenga d’os poderosos y con un lenguache inaccesible pa la mayoría de personas.
Por eixemplo, en os lugars y comarcas aragonesas somos feitos a que las politicas que afectan a lo medio rural se disenyen dende las ciudatz, partindo d’una realidat allena a la nuestra vida cutiana. Estas politicas tamién se basan en diagnosticos que s’elaboran dende univerisidatz y consultorías tecnicas que tienen una anvista y unas trazas urbanas de tot.
Esta perspectiva sobirana mira de fer chirar esta dinamica, metendo a las personas oprimidas en o centro d’o conoiximiento, ubriendo puertas pa que ellas mesmas lo produzcan, controlen y distribuyan. Continando con o eixemplo rural, a sobiranía d’o conoiximiento mira de que sigan as personas que viven en os lugars as que lideren os diagnosticos sobre lo suyo territorio, sobre la suya historia y tradición y que tiengan ferramientas pa estar os amos d’o suyo propio futuro. O reto ye estar capables de fer y adaptar o conoiximiento scientifico en as diferents arias d’o saber a la propia realidat local, privando-se d’os sesgos que plegan d’o sentiu común que ye colonizau por l’imachinario urbano.
En o concreto d’a pachina web, a mayoría d’o conteniu responde a tres arias d’o conoiximiento sociolochico: a sociolingüistica, o desenrrollo local y os estudios de choventut. En estes estudios he participau yo y atros companyers que compartimos estes rasgos d’identidat: son estudios de choventut feitos por chovens, estudios sociolingüisticos feitos por personas que parlamos cutianament aragonés y catalán y estudios de desenrrollo local lideraus por personas que vivimos en zonas rurals.
As luengas d’este espacio virtual continarán estando las nuestras: o catalán, l’aragonés y lo castellano, y se contará con colaboracións de companyers y companyeras que treballan dende lo país con a mesma perspectiva, como Natxo Sorolla, Carmén Capdevila u Pep Espluga, entre atros.
Bienvenius y bienvenidas a la nueva Sociolochía. Continemos construindo entre totz y todas sobiranía d’o conoiximiento.
Deja un comentario